Powěsće Serbskeho rozhłosa
Hauptinhalt
18. róžownika 2024, 23:36 hodź.
Wobsah artikla:
- Choćebuz: Myto Miny Witkojc na dr. Norbergowu
- Sprjewiny Doł: EU-komisar na wopyće we Łužicy
- Budyšin: Přihotuja 5. Slawiniadu
- Njebjelčicy: Hospodarski plan wobzamknyli
- Polevsko: "Hezky Česky" serbskich šulerjow
- Łuty: Swjeća swój 650. jubilej
- Dešno: Wólbny wuběrk za wólby Serbskeje rady Braniborskeje so konstituuje
Choćebuz: Myto Miny Witkojc na dr. Norbergowu
Wědomostna sobudźěłaćerka při Rěčnym centrumje Witaj, dr. Madlena Norbergowa z Choćebuza, dóstanje Myto Miny Witkojc. To zdźěli braniborske ministerstwo za wědomosć a kulturu. Z nim hódnoći so dołholětny angažement dr. Norbergoweje na dobro serbšćiny na najwšelakorišich polach. Mjez druhim je Norbergowa rozšěrjeny studijny kurs "serbšćina" za wučerjow při Potstupimskej uniwersiće organizowała, delnjoserbsku rěčnu certifikaciju sobu natwariła a mnoho projektow za sylnjenje serbšćiny přewjedła. Myto je z 2.500 eurami dotěrowane, wone přepoda so 6. junija w Choćebuzu.
Sprjewiny Doł: EU-komisar na wopyće we Łužicy
EU-komisija chce přetwar Łužicy k prěnjemu europskemu modelowemu regionej za hospodarstwo bjez klimowych płunow podpěrać. To rjekny industrijowy komisar EU Thierry Breton na swojim wopyće w Čornej Pumpje. Komunalny łužiski zwjazk bě so w měrcu wo status tajkeho modeloweho regiona požadał. Při tym dźe wo spěšne zawjedźenje industrijow a energijoweho dobywanja bjez přidatnych, za klimu škódnych płunow. Po słowach Bretona by modelowy region wunjesł "wjace spěchowanskich pjenjez a inwesticijow, wutwar infrastruktury, lokalne kompetencne centry a wysokokwalitne dźěłowe městna."
Budyšin: Přihotuja 5. Slawiniadu
Kónc přichodneho tydźenja wotměje so w Budyšinje 5. Sakska Slawiniada. To zdźěli kultusowe ministerstwo. 40 pólsce, čěsce, rusce a serbsce wuknjacy spjelnja w měšanych mustwach wšelake nadawki w jim dotal cuzych słowjanskich rěčach. Při tym zhonja tež zajimawostki wo kulturje a tradiciji w tutych krajach a ze serbskeho rěčneho ruma. W programje slawiniady wobdźělnicy słowjanski rap we wšelakich rěčach napisaja a nahrawaja a sej k tomu breakdance wumysla. Slawiniada so kóždej dwě lěće wotměwa. Lětsa wobdźělitej so Serbski gymnazij Budyšin a Wyša šula Slepo.
Njebjelčicy: Hospodarski plan wobzamknyli
Gmejnska rada Njebjelčicy je na swojim zašłym posedźenju hospodarski plan za 2024 wobzamknyła. Tak ma so hrajkanišćo w Njebjelčicach rozšěrić. Naprawa ma so zhromadnje ze staršiskej iniciatiwu, twarskim dworom a wobydlerjemi zwoprawdźić. Dale ma so za 10.000 eurow elektroinstalacija při sportowym domje w Pěskecach ponowić, dokelž je dodźeržana.
Polevsko: "Hezky Česky" serbskich šulerjow
Na wuměnu do čěskeje šule w Polevsku je so jědnaće šulerjow Serbskeje zakładneje šule Budyšin podało. Hromadźe z čěskimi šulerjemi nazwučuja program, kotryž so na swjedźenju "Nepomuk" předstaji. Je to hermank, na kotrymž so regionalne twory poskićeja a kulturne skupiny předstaja. Na nim chcedźa tež němsko-čěski swójbny dźeń iniciěrować a z tym mosty k dorosćenym wutworić. Kreatiwnu dźěłarničku podpěra euroregion Nysa.
Łuty: Swjeća swój 650. jubilej
We Łutach woswjeća swjatkowny kónc tydźenja 650. jubilej prěnjeho naspomnjenja. Hač do póndźele změja tam rewiju z operetami, kabaret, tójšto hudźbnych poskitkow najwšelakorišich skupin a jako wjeršk wohnjostroj. Na swjedźenskim hermanku steji 40 metrow wysoki karusel. Za tři njedźele woswjeća Łuty swoje narodniny z wosebitymi łužiskimi wikami a prezentacijemi wohnjoweje wobory.
Dešno: Wólbny wuběrk za wólby Serbskeje rady Braniborskeje so konstituuje
Přichodna Serbska rada Braniborskejeje wuzwoli so lětsa w decembru. Na to je so wólbna komisija w Dešnje dojednała. Jako předsydku wuzwolichu jednohłósnje Margit Neugebauerowu z Drjowka, kotraž je zdobom tež předsydka serbskeho wuběrka wokrjesa Sprjewja-Nysa. Jeje zastupjer je wjesnjanosta w gmejnje Dešno/Strjažow Fred Kaiser.